Кăçал Раççейре Театр çулталăкĕ пулнă май «Хыпар» Издательство çурчĕн ача – пăча кăларăмĕсен редакцийĕ «Театр – манăн пурнăçра» видеоконкурс ирттерчĕ. Унăн тĕллевĕ – артист пултаруллăхĕллĕ ачасене тупса палăртасси, аталанма хавхалантарасси пулчĕ. Конкурсра 1-9-мĕш классенче вĕренекенсем хутшăнчĕç. Видеоĕçре чăвашла е вырăсла пĕр-пĕр юптарăва е пьеса сыпăкне выляса кăтартса памаллаччĕ.

            Редакцие çитнĕ ĕçсем пĕри тепринчен кăсăклăрах пулчĕç. Вĕсене Валерий Карпов (К.И. Иванов ячĕллĕ Чăваш патшалăх академи драма театрĕн актерĕ,Чăваш Республикин тава тивĕçлĕ артисчĕ), Юрий Филиппов (Чăваш патшалăх пукане театрĕн илемлĕх ертÿçи, Чăваш Республикин тава тивĕçлĕ артисчĕ) тата Дмитрий Петров (Çеçпĕл Мишши ячĕллĕ Чăваш патшалăх çамрăксен театрĕн артисчĕ) хакланă. Ушкăнсен хушшинчи ăмăртура Пăчăрлă Пашьелĕнчи 5-мĕш класра вĕренекенсен видеоĕçĕ 3-мĕш вырăн йышăннă.

            Çак кунсенче А.Алямова, Д.Маркова, М.Исаев, Ю.Прохорова, Е.Корчакова «Хыпар» Издательство çуртĕнче уявра пулчĕç. Унта çĕнтерÿçĕсене Хисеп хучĕсем, парнесем парса чысларĕç.

            Çамрăк артистсене малалла та тĕрлĕ конкурссенче çĕнтерÿçĕсем пулма сунатпăр.